Materi Pawartos Basa Jawi Kelas x

PAWARTOS BASA JAWI

Tegesipun pawartos

Pawarta inggih punika informasi ngèngingi kadadosan ingkang sampun kelampahan, awujud cetak, elektrinik , utawi lisan

Ciri-ciri pawarta.

a.      Aktual       : tansah wonten pawartos énggal

b.      Faktual      : pawarta ingkang trep kaliyan kedadosan saestunipun.

c.       Objektif     : pawarta ingkang kaaturaken kanthi seimbang boten boten mihak.

d.      Publisitas : katujokaken kagem masyarakat umum

Struktur nyerat pawarta.

Pawarta kaserat limrahipun kaserat mawi 5W + 1 H, inggih punika“what, who, when, where, why, how,” (Punapa, sinten, kkapan, Wonten pundhi, amargi punapa, kadospundi)

Maos Teks Pawarta

Ingkang kedah dipungatosaken rikala maos pawartos inggih punika:

1.  intonasi kedah pas (nggatosaken koma saha titik, uga tandha sanèsipun);

2.  vokal trep kaliyan artikulasipun;

3.  volume utawa lirih soraning swanten kajumbuhaken kaliyan kahanan;

4.  sasaged-sagedipun nyingkiri dhialek, kajawi kanggo pawarta ing TV lokal.

5. paningalipun sasaged-sagedipun katuju marang pamiyarsa

Materi Tembang Macapat Kelas x

KAWRUH TEMBANG MACAPAT

            Tembang/sekar  inggih  punika  reriptan  utawi dhapukaning  basa  mawi paugeran  tartamtu (gumathok) ingkang pamaosipun kedah dipunlagokaken nganggé kagunan swanten (Padmosoekotjo,1960: 25). Macapat punika sekar tradhisional ing tlatah Jawa. Macapat ugi mrathah wonten ing kabudayan  Bali,  Madura, saha  Sunda.  Menawi  dipuntingali  saking  kérata  basa,  macapat  punika tegesipun  maca  papat-papat.   Maosipun  sekar  macapat  pancèn  wonten  ingkang  rinakit  saben sekawan wanda (suku kata). Nanging boten sedaya gatra sekar macapat saged kawaos papat-papat.

            Sekar  punika  kinten-kinten  tembé  kémawon  wonten  ing   pungkasaning  jaman  Majapahit  saha wiwitan  wali sanga  nyepeng  kuwasa.  Nanging punika  ugi dèrèng  mesthi,  amargi boten  wonten ingkang  gathuk  saged  mesthèkakén.  Macapat  kathah  dipunanggé  ing  sapérangan  Sastra   Jawa Tengahan lan Sastra Jawa Énggal. Menawi dipunsandhingaken kaliyan Kakawin, paugeran-paugeran utawi  metrum  ing sekar macapat langkung gampil. Kitab-kitab jaman Mataram ènggal, kados déné Wédhatama,  Wulangrèh,   Serat  Wirid  Hidayat  Jati,  Kalatidha,  saha  sanès-sanèsipun  dipunrakit nganggé sekar macapat. Paugeran-paugeran punika wonten ing:

•   Guru gatra : cacahing wilangan larik/gatra saben pada (basa Indonesia: bait).

•   Guru wilangan : cacahing wilangan wanda (Indonesia: suku kata) saben gatra.

•   Guru lagu : tibané swara ing pungkasaning saben gatra.

            Panyekaring tembang macapat punika temtunipun kedah kaselarasaken kaliyan titilaras (notasi), laras, saha pathetipun gamelan. Déné urut-urutanipun sekar macapat punika sami kaliyan lampahing manungsa saking jabang bayi  abang dumugi tumekaning pejah.

Saged ugi kababar kados mekaten:

            Manungsa lair ing ngalam donya medal saking guwa garba (Mijil), nalika taksih alit kedah dipuntuntun utawi dipunkanthi (Kinanthi), bilih sampun mudha taruna (Sinom), gadhah raos tresna utawi  paring  katresnan   marang   tiyang  sanès  (Asmaradana).  Ingkang  saweg  nandhang  asmara swasananipun ketingal éndah saha manis (Dhandhanggula). Sasampunipun mengku kulawarga kedah mangertos (Gambuh) marang prakaraning gesang. Menawi  sampun sepuh gesang bakal ngambang (Maskumambang) ménggalih donya saha akhérat. Tambah sansaya mundur  (Durma) mungkur ing kadonyan  (Pangkur)  ngadhepi akhérat  mula  gentur ngibadah.  Sasampunipun pejah  ateges  pegat ruhipun (Megatruh). Banjur dibuntel utawi dipunpocong (Pocung).

Paugeran Tembang Macapat

No	Tembang	Guru gatra	Guru wilangan	Guru lagu
1	Maskumambang	4	12, 6, 8, 8	i,  a,  i, a
2	Pucung	4	12, 6, 8, 12	u, a, i, a
3	Kinanthi	6	8, 8, 8,  8, 8, 8	u, i, a, i, a, i
4	Asmaradana	7	8, 8, 8,  8, 7, 8, 8	i, a, e, a, a, u, a
5	Pangkur	7	8, 11, 8, 7, 12, 8, 8	a, i, u, a, u, a, i
6	Durma	7	12, 7, 6, 7, 8, 5, 7	a, i, a, a, i, a, i,
7	Mijil	6	10, 6, 10,10,6,6	i, o, e, i, i, u
8	Gambuh	5	7, 10, 12, 8, 8	u, u, i, u, o
9	Sinom	9	8, 8, 8, 8, 7, 8, 7, 8, 12	a, i, a, i, i, u, a, i, a
10	Megatruh	5	12, 8, 8, 8, 8	u, i, u, i, o
11	Dhandhanggula	10	10, 10, 8, 7, 9, 7, 6, 8, 12, 7	i, a, e, u, i, a, u, a, i, a

 (Saking pinten-pinten sumber kanthi éwah-éwahan sawetawis)

Materi Cariyos Pengalaman Kelas x

Cariyos Pengalaman

Nyariosaken pengalaman pribadi utawi pengalaman tiyang sanès kanthi ngginakaken basa krama alus utawi basa ngoko lugu. Nyariosaken pengalaman pribadi utawi pengalaman tiyang sanès ngengingi kedadosan-kedadosan ing wekdal tartamtu. Cariyos pengalaman punika kalebet cariyos pengalaman warni-warni, kadosta pengalaman lucu, pengalaman nggegirisi, pengalaman sedhih saha sadaya pengalaman ingkang boten saged dipunsupèkaken. Cariyos pengalaman  lucu, pengalaman medeni utawi pengalaman sedhih saged kapendhet piwulangipun kanggé kaca bénggala minangka pandoming tumindak lan ing tembé wingkingipun tansaha kebak pangatos-atos.

Supados anggènipun cariyos pengalaman punika saé, prayogi migatosaken ing ngandhap punika:

1.    Cariyos bab pengalaman punika tegesipun nyariyosaken pengalaman ingkang boten saged dipunsupèkaken.

2.    Ukaranipun prasaja lan cetha

3.    Tembung-tembungipun gampil dipun mangertosi.

4.    lagunipun ingkang cetha lan saged milah-milahaken frasa-frasa (kelompok kata). Dados pangucapipun boten satembung mbaka satembung, pilihaning tembung ingkang nengsemaken.

5.    Anggènipun cariyos dipunkanthèni solah bawa lan polatan (mimik) ingkang trep kaliyan ingkang dipuncariyosaken.

6.    Gampil dipunmangertosi topikipun cariyos.

7.    Nalika guneman pocapan kedah cetha, boten groyok, bléro utawi mangu-mangu (ragu- ragu). Kedah saged ngucapaken aksara kanthi leres, upamipun mbédakaken aksara a/o; t/th;d/dh; è/e/é, lan sapanunggilipun.

Nyariosaken pengalaman kedah nggadhahi unsur-unsur kados ing ngandhap punika:

1.  pengalaman punapa ingkang badhé kacariyosaken

2.  wekdalipun rikala punapa kedadosan pengalaman kala wau

3.  papan panggènan kedadosan pengalaman kala wau

4.  tiyang-tiyang utawi paraga-paraga sanès ingkang ndhèrèk mlebet ing cariyos kala wau

5.  sebab-sebabipun pengalaman wau kedadosan

6.  kados pundi pengalaman punika kedadosan.